Monday, December 18, 2006

天星碼頭 公民抗命

呢幾日,孫柏文喺 電視見到好多反對清拆中環天星碼頭公民抗命嘅片段。首先,作為一個曾經喺花旗國底特律(八成大廈、物業被業主遺棄,產生嚴重社會問題)附近返過學嘅人,我 對清拆任何建築物都冇乜太大嘅情意結。例如,當時話要拆居屋項目紅灣半島,我都好似「環保先鋒」陸恭蕙一樣好支持。


不過,我就唔支持重建,因為我覺得拆咗 紅灣半島之後,塊地皮應該改為公園,叫做「八萬五紀念公園」。雖然,今時今日紅灣半島決定唔拆,我都仲覺得可以改名叫「八萬五紀念花園」。尋日同利世民兄 講起呢個概念時,佢話:「公園?花園?應該叫「八萬五紀念浩園」,紀念啲被八
萬五玩死嘅人。」

不過,講起公民抗命,特別係市民維護啲覺得有象徵性嘅嘢,我 就不能不提紐約市金融區嘅「銅牛」Wall Street Bull。原來呢隻牛係有一位藝術家,喺1987年大股災睇見花旗國人失去自信心之後,覺得要提醒大眾市民花旗國嘅「打不死、一 定好」精神,所以用咗兩年時間同36萬美金去鑄造。造好之後,就一夜之間用重型貨車運到華爾街擺放。因為完全係自發秩序,冇政府批准,所以市政府就「好有 效率」咁攞咗走。不過,因為全個紐約市都好喜歡呢隻牛,最後市政府投降,將隻牛放番喺金融區,亦變成紐約市數一數二嘅旅遊景點。

我 哋特區政府就連可以紀念1967年大暴動嘅天星都拆,我相信大家如果要公民抗命成功,就要學嗰位紐約藝術家咁,做件連政府都唔敢郁嘅藝術品。小弟有個建 議,就係造一個鄧小平同志銅像,下面寫住:「誰不改革,誰就下台。」一隻手食煙,另一隻手就指向前。造咗銅像之後,當然就要諗擺邊同乜嘢方向,呢個問題就 留番畀大家諗。哈!哈!

2 comments: