噚日，報紙頭版刊登咗一篇聞者傷心，見者流淚嘅報道。話說，一位未成年少女，喺金沙度玩老虎機，「贏咗」74萬，不過可惜，由於贏咗老虎機要記名登記，佢未夠秤，職員知道之後，冇賠到畀佢。
除咗嗰個女仔欲哭無淚，因為人生冇幾多個機會可以中到大額老虎機獎，咁早就用咗個quota，我都幾戥佢唔抵，但係最唔開心嘅，一定係金沙主席Adelson。
家開賭場，唔係驚你賭錢贏到開巷兼肥到襪都着唔到，最驚嘅，係你唔嚟賭，而有咩嘢誘因令到賭客唔去賭，就係賭場傳出贏錢冇得賠嘅消息，賭仔心態，有機會贏，風險幾大都會去博，但係俾人知道冇得賠，輸梗，邊個肯嚟？
大 家可能會問：「點解賭場唔驚人大包大包錢咁贏走？」賭場係一盤靠機會率嚟贏錢嘅生意，雖然喺賭枱上面，好明顯係不公平競爭，賭場贏嘅機會係大賭仔好多，不 過就算係咁，如果好少人去賭，求其俾人贏咗一鋪甘嘅，賭場都有機會會輸。如果又要做生意，又要必贏，方法唔係唔賠錢趕客，而係增加賭客嘅數量，可能中間會 有偏差，令一啲好命嘅賭客贏到錢，但係大量嘅賭客機會率都係落咗喺輸錢嗰邊，人越多，賭場想輸都幾難。
番 轉頭講金沙，我諗Adelson如果嗰個時間在場，一定寧願細細聲、隻眼開隻眼閉咁賠幾十萬畀個女仔，因為會好過第日見報，大字標題寫住「金沙唔畀錢」， 睇住篇報道，我彷彿聽到Adelson喺我耳邊講：「我哋又點會冇得賠，估唔到今次衰喺一個o靚妹手上，唉！」所以，最後忠告所有未成年人士：未夠秤又想 去賭，唔係唔得，但係絕對唔可以玩老虎機，因為贏得大，一定會好揚，佢想賠畀你都難。最好玩一啲用現金即時派彩嘅遊戲，最好就係坐喺啲講普通話、貌似大陸 貪官嘅人隔籬，因為如果佢贏到錢都有得賠，咁賭場就算覺得你未夠秤都一定照賠！
No comments:
Post a Comment