澳博.org？

前日，《利字當頭》一欄總舵主利世民兄搵孫柏文去食貴價燒味，約咗喺我辦公室度見。不過因為世民兄到達嘅一刻，我仲未寫完稿，所以叫世民兄睇吓報紙，就算世民兄話自己「好Q肚餓」，都要等一等。不過，唔知道世民兄係唔係餓到血糖好低，又或者想引誘我快啲寫好啲稿，佢重複又重複咁喺度講可以叫嘅嘢。而我就越聽越肚餓。

為求可以減低口水同胃液分泌，盡量專心寫稿，我就開始同世民兄講吓時事。因為佢係個對時事非常敏銳嘅性情中人，平時只要搵到啲嘢令佢發火，世民兄就會不停謾罵，到時我只要耐唔耐點點頭，問：「真係咁衰？」，就可以專心寫稿。不過，今次好似冇效。

同 佢講話：「有冇留意到『計劃競爭法』嘅最大聲支持者，例如消委會陳黃穗、嶺南大學陳坤耀、立法會議員湯家驊等等，全部都係喺冇開放競爭嘅行業裏面工作。一 個係政府出糧機構嘅總裁，一個係政府畀錢嘅大學校長，一個就係連前宗主國大狀都要排斥嘅本地大律師。」世民兄聽完之後，只答：「我想分番碗鐵碗燒肉飯 食！」

問世民兄：「前幾日，股壇長毛David Webb計數篤爆『強迫金』係官商勾結嘅老千局，不過就算全城和應挺Webb，全港市民一齊罵政府，都好似冇用？」世民兄聽完之後，只答：「我想分番碗燒鵝瀨食！」

燊哥咁嬲係有因

見 到講政治冇用，我就開始講財經時事，「噚日，澳博賭場『新葡京』開幕，之後睇何鴻燊開記者招待會，真係覺得佢老人家仲好好火，寸爆『金沙』主席 Adelson。最重要係，被記者問到點樣抵抗金沙同永利嘅時候，仲要好堅定咁話『會陸續多好多橋，冇橋就冇得競爭。』最衰佢賣關子，要到過年之後先至知 賣乜橋，不過起碼知道何鴻燊抵抗外敵嘅底線就係佢嗰個句『橋唔怕舊，最緊要受。』你點睇？」世民兄聽完之後，只答：「叉燒飯！叉燒飯！叉燒飯！」

講真，孫柏文睇 何鴻燊日前喺記者招待會，被問及金沙主席Adelson話「金沙登陸澳門後，已取得領導地位」嘅時候，真係感受到佢老人家唔妥Adelson。其實，用最 簡單嘅計算方法，都可以明白點解燊哥咁嬲。單憑澳博仲佔有過半數63%博彩市場佔有率，就可以明白以「市場佔有率」呢個計法，澳博先至有領導地位。

不過， 澳博收入非常依賴「貴賓廳百家樂」，而呢類型嘅賭博客源，係非常倚賴中介人去搵番嚟，而中介人係收佣。睇番當年，去睇又係非常依賴「貴賓廳百家樂」嘅銀河 娛樂23盤數，就算有好多億嘅收入，利潤都可以分分鐘係零。因為從賭客收番嚟嘅錢，全數畀晒班中介人。所以就算有好大嘅市場佔有率，佣金成本高，都係得個 桔。可能金沙主席話嘅唔係市場佔有率，而係利潤？

當年，好多人曾經話過啲網上公司dotcom，例如Amazon.com，應該改名叫做 Amazon.org，因為Amazon.com冇錢賺，而org係畀啲「非牟利社會企業」用。因為我都想知澳博有冇錢賺，所以我都希望佢可以成功申請上 市，到時候就可以睇招股書知道，究竟係「澳博.com」定係「澳博.org」。

"Adelson can fuck off..."
- Stanley Ho Circa 2007