政府誘人假結婚

相信各位金手指嘅fan屎都同我孫柏文一樣，覺得結婚係一件好神聖嘅事，不過，喺早幾日，香港政府「成功」歧視中港婚姻，控告一名內地漢子「假結婚」。

大家可能會問：「佢哋認喎，告佢有咩唔啱？」咁我要問大家，點先係假結婚？

政府又用咩去衡量假結婚，然後開始調查？而且，點樣先叫做真結婚？有冇一齊住？見面嘅時間？冇愛情就唔算真結婚？但係愛唔愛，外人根本唔可能知道。好明顯，呢條假結婚罪，好似裁決乜嘢係不雅、叛國、公平競爭一樣，係一條要人估估吓嘅法例。

其實，呢次告一個中港通婚例子嘅時候，官僚有冇諗過，政府做咗好多政策，利誘香港人去結婚，去註冊得到金錢上嘅利益，搞cheap晒神聖嘅婚姻。

好 似現有嘅結婚免入息稅，令結婚有咗金錢誘惑，本來兩個人嘅終身大事，加入咗經濟考慮。又例如公屋政策，利誘港人結婚去換取更快或者更大嘅單位，當中申請個 案中，有幾多係真，幾多係假，我唔敢講，但係原先純潔嘅婚姻，因為呢的威迫利誘政策，就算有情侶係兩情相悅而結合，有咗免入息稅或者申請咗公屋，都好難同 人講佢哋結婚係好神聖。

何不放寬移民政策

喺 以前仲有首次置業貸款嘅時候，我識得好多朋友，本來完全冇動機去結婚，但係為咗拎貸款，所以去結婚。最後貸款到手，佢哋亦離婚收場，如果要查假結婚，應該 首先睇吓兩個都係100%港人嘅註冊，而唔係戴住有色眼鏡咁去查中港結婚夫婦。

政府提供大量金錢利誘，搞cheap咗神聖嘅婚姻。如果政府覺得內地人同港 人結婚係為咗福利或者工作機會，所以要查，咁點解唔索性收緊綜援同放寬移民政策，令到本身想嚟香港工作嘅人，唔需要透過結婚先可以嚟香港？

最後可以令到結 婚變番神聖嘅方法就係，取消晒呢的政策帶來嘅金錢利誘，令到本來想結婚嘅人，唔需要再為咗其他經濟考慮。到時，就算真係有人無端端「假結婚」，但係佢哋又 影響唔到人，攞唔到其他人着數，咁又關其他人咩事呢？