噚日，約咗《利字當頭》專欄總舵主利世民兄同佢個女，去飲茶食午飯。幾個月冇見，世民兄個女又大咗好多。雖然一路以嚟，我都知道佢個女好精靈活潑同聰明伶俐，不過今次我察覺到，佢個女他朝定成為運動健將，仲係好厲害嘅籃球員。
我咁肯定嘅原因，係因為正當世民兄餵佢食叉燒包嘅時候，佢一搶走個叉燒包（steal），跟住就橫跨張枱咁掟個包埋我個位（from downtown），之後個包仲要直接飛入斟滿普洱茶嘅杯裏面（swish）。最衰冇機會用手機拍低，如果唔係一定會放上YouTube。
就喺我抹乾件恤衫嘅時候，茶樓嘅電視就報道關於滙豐控股（005），好罕有咁發出盈利警告嘅新聞，令股價大幅下滑。據報道，滙豐話壞賬撥備嘅金額，喺06年需要多20%。報道仲話壞賬多咗係因滙豐花旗國嘅業務，面對好多人因當地樓市爆破所以還唔到錢。
世民兄一聽到呢段消息就話：「有冇搞錯！股價唔係應該一早反映咗呢個壞消息，點解個股市好似好驚訝。唔係個個都知美國樓市爆煲咩？唔係個個都知滙豐美國業務會好差咩？」
孫柏文：「唔好咁講，聯儲局喺佢1月會議之後嘅聲明，都話花旗國樓市下跌速度有開始穩定嘅現象，所以先至會令到個市好似好驚訝。」
世民兄：「仲有人信聯儲局咩？唔係啊嘛？」
其實，孫柏文已經多次重申花旗國樓市會好大鑊。而因為滙豐美國業務專攻低下階層，樓市大升時，佢哋就算收入唔夠畀供款，都可以做二按攞錢還款，所以製造咗一片歌舞昇平嘅假象，而樓市一跌，咁就大鑊。我奉勸大家，千祈要忍手，唔好咁快去買滙豐，等花旗國樓市跌到底先至安全。
最 後，我覺得今次盈利警告，對滙豐嘅管理心態嚟講，絕對唔係好事。股神畢菲特最唔鍾意任何上市公司有盈利預測，原因係管理層一提供預測，就會有誘因千方百計 將盈利迫上預測水平。好則令管理層採取短視嘅管理方針，壞則令管理層遲早越軌。希望今次盈利警告，會係滙豐最後一次提供盈利預測，滙豐應該抗拒分析員啲要 求，叫佢哋自己去計數啦！
No comments:
Post a Comment