股災祖國政府應做乜

1987年10月20號朝早，孫柏文作 為一個小學生，再次開開心心上學去搗蛋。大家如果較年長，應該記得1987年10月19日，就係花旗國股票市場嘅「黑色星期一」股災。當日，道指跌咗 26%，打個比喻，即係今時今日嘅恒指喺一日內跌5000點，亦係花旗國股市有史以來單日最大跌幅。因為對上一次花旗國股市有咁大規模嘅股災，就係 1929年，亦係世界經濟大蕭條嘅序幕，所以花旗國人民都好怕歷史會重演。

雖然嗰次股災最終對世界經濟冇乜事，不過花旗國政府都因「黑色星期一」而推出一 連串政策，去防止超級大股災發生。其 中一個政策，就係「鑑」粗引進「跌停板」機制。根據官僚大腦嘅思維，佢哋一定係諗：「如果跌500點就係『不可接受嘅大股災』，咁只要我哋引進『跌停板』 機制，個市一跌400點就停止交易，個市咪冇可能有『大股災』囉！」不過班官僚冇諗過，1929年股災引發經濟蕭條嘅其中一個原因，係人民覺得個市「未到 底」，所以不投資、不消費，影響經濟活動。

其實，如果大市可以一日內除清瘀血，最緊要真係「到底」，投資者就會像火鳳凰般，置諸死地而後生。無時無刻嘅價 格變動，都係喺到同大家講「如何分配投資資源」，粗暴「停止價格變動」只會得唔到穩定嘅效果，因為大家都唔知道所有嘢值乜價。

當然，呢啲咁嘅官僚大腦思維 「好嘢」，我哋祖國政府係唔會重蹈覆轍。不過，雖然祖國冇「成個市跌停板」機制，不過有「個別股份跌停板」機制。喺呢個機制之下嘅「不可預見的後果」，就 係將每一間獨立上市公司嘅股票「鐵索連舟」，股災時就會出現「火燒連環船」。因為如果你係個基金經理，買重咗公司A嘅股票，公司A開始下跌，你亦知道好多 投資者會贖回基金，所以你要套現。不過，公司A跌停板，停止交易，你惟有不願意咁出售其他股票，變成骨牌效應。最後，越嚟越多公司股票跌停板，原先用嚟 「穩定市場」嘅跌停板機制，就會令市場更加不穩定。

希望經過噚日，上海股市1200幾隻股票當中，有900幾隻跌停板嘅教訓，祖國政府盡快取消跌停板機 制。