知道自己被騙的一刻……

唔知道大家有冇好似孫柏文咁試過，覺得股市會升，所以走去買恒指認股證。之後，股市真係升，不過走去銀行睇股票機嘅時候，發覺自己買咗嗰隻認股證郁都唔郁，跟住同企喺隔籬個嬸嬸大叫：「我俾人呃咗啊！俾人呃咗啊！呃咗啊！」

其實，大家就算未試過買恒指認股證，都應該試過被騙。而往往喺被騙過程中，最痛苦嘅一刻，就係發現自己「俾人呃咗」嘅一刻。大家可能會問：「今日，孫柏文突然講「俾人呃咗」呢樣嘢，係唔係想安慰曾經跟住金手指建議，買過熊證嘅讀者？」我可以同大家講，雖然我日日都想安慰我啲戰友，不過今日講被騙呢樣嘢，唔係為咗熊證單嘢。

開始懷疑 慢慢接受

呢個周末，孫柏文睇到一段新聞。話說有一位姓陸、叫Bonnie嘅姐姐，佢老公四年前見到街邊有人販賣聲稱「最多會十磅重」嘅寵物豬，而佢老公知道Bonnie係一個充滿愛心嘅人，所以就用咗1800元買隻豬返屋企。點知，隻豬越養越大，去到四年之後嘅今日，已經有二百幾磅。

我睇到呢段新聞嘅時候，真係好想知道，究竟Bonnie同佢老公幾時先至發覺「俾人呃咗」？

係隻豬越養越大，慢慢開始懷疑，跟住又慢慢接受？定係有一日清早時分，個老公喺廁所「做事」嘅時候，Bonnie突然敲廁所門問：「老公，我哋隻豬係唔係真係最多會重十磅？家已經一百磅，使唔使去寵物店問吓佢哋有冇畀錯豬我哋？」

Bonnie姐姐好好人

不過，我見到Bonnie喺電視機被電視台訪問嘅時候，真係非常妒忌佢老公。點解？理由好簡單，Bonnie姐姐就算被騙，搞到屋企擺咗隻二百幾磅重、每日瞓覺都瞓20個鐘嘅豬，都冇「隊」佢出街，就知Bonnie姐姐一定好好人。

唔好話係隻豬，當年讀大學放暑假嘅時候，我每日瞓20幾個鐘，孫媽媽忍咗幾日之後，連自己個仔都「隊」咗出街，叫我搵暑期工做，所以，我今日一定要重申：「Bonnie姐姐一定好好人」。