日本快爆搶金潮

今日首先要同大家講，孫柏文今 日會讓啲版位畀《利字當頭》一欄總舵主利世民兄。理由係，世民兄話有感而發，要同大家分享佢老婆同永亨銀行客戶服務部嘅奇妙經歷，希望大家有共鳴。我只可 以話希望永亨銀行嘅公關科同事，可以寫信入嚟，等我都可以同大家分享永亨嘅回覆。

入正題。

大家作為《金手指》嘅fan屎，都應該知道世界各國嘅中央銀行， 最害怕嘅就係黃金同白銀。因為就算中央銀行為首嘅建制，可以控制「消費物價指數」嘅計算方法，令到好似冇通脹出現，不過只要金價、銀價上升，紙幣購買力不 斷被削弱嘅事實，就會赤裸裸暴露出來。所以，一眾中央銀行會用盡所有財技手段去控制金價。

日央行有心無力

早 幾個禮拜，眾中央銀行嘅俱樂部國際貨幣組織IMF，就出嚟話因為發展中國家個個發達，毋須要問IMF借錢，所以冇利息收入去彌補營運開支。唯一可以開源嘅 方法，就係將手上「冇用」嘅黃金賣出，變成紙幣再去投資。佢哋擺到明就係想打壓金價，仲要慌死驚冇人知佢哋想打壓，行出嚟話：「我哋會叫其他中央銀行減慢 賣金嘅速度同數量，等金價可以穩定。」希望用呢句說話，令人諗：「各國嘅中央銀行都係各自為政，冇可能可以協調佢哋賣金嘅數量，都係賣咗啲金好啲！」

雖然 呢個「口術」高明，不過建制當中，有啲人就連「紙幣可以保值」呢個大話都懶得講，紙幣要貶值就貶值。大家可能會問：「邊一間中央銀行，會完全唔理自己貨幣 同金價嘅關係？」原先就冇，間間央行都一定會留意，不過，有一間中央銀行就有心無力，因為被人挾持。呢間就係日本中央銀行，如果裏面嘅官員唔聽話，唔肯濫 發鈔票，就會被自民黨爆醜聞，可能因日央行個個都身有屎，所以先至被挾持。

其實，孫柏文相 信早排IMF無端端出口術去打壓金價，係因用日圓計算，金價已經逼近舊年5月嘅紀錄。點知日央行被挾持要濫發鈔票，所以就喺上個禮拜，以日圓計算，金價升 穿舊年5月紀錄，建立20幾年嘅新高位。我相信日本好快就會爆發搶購黃金潮，到時候就算以美元計算，都可以衝過舊年5月，730美元一盎斯嘅紀錄，而相伴 嘅白銀，又點會唔爆上？