豬年最應沽的藍籌股

孫柏文心裏面有一隻又愛又恨嘅藍籌股。首先，我愛呢隻股票嘅原因，係公司 管理層對自己嘅行業瞭如指掌，亦一向以來明白、繼而證實世界大趨勢必定會利好該行業。仲要管理層每一次定下來嘅多年計劃，一定成功落實，兼且為公司帶來一 開始已經預測會有嘅非常可觀盈利增長。可以話牙齒當金使，有世界級競爭力香港人之典範。

公司最令我如癡如醉嘅原因，就係多年來派息比率高達80%，公司賺1蚊、股息派8毫，公司有錢賺、股東笑呵呵。

大家聽到我咁樣形容呢間公司，都應該同我一樣有少少心動。不過，我恨呢隻股票嘅原因，就係因為以上同大家講過嘅公司優勢，全世界都知，甚至可以話有好多投資者比我更相信該公司戰無不勝嘅神話，所以令到隻股好貴。

呢隻藍籌股就係利豐（494）。

有 心機選擇外判商，可以令各種貨品每一步嘅工序成本下降，亦同時將品質提高。有效運用供應鏈，就會令總存貨數量減少，亦同時減少供不應求、熱賣貨品斷市嘅情 況出現。控制到登峯造極嘅供應鏈，甚至可以令產品盡快變種去迎合不停改變嘅消費者口味，公司就可以減低「估估吓、估錯咗」口味帶來嘅損失。呢啲利豐全部做 得到。因為如此，所以今時今日投資者肯出45蚊去買利豐每1蚊嘅利潤，即係等於市盈率高達45倍，做個比較，滙豐（005）嘅市盈率都係得13倍。喺花旗 國，出晒名貴嘅Google，市盈率都係得49倍。當然，利豐近年真係可以交出每年20%嘅盈利增長，所以先至有咁多fan屎。

不 過，孫柏文非常擔心利豐股價前景，因為利豐一向以 來都被認為係一隻反映花旗國消費者信心嘅股票，而花旗國正面對樓市爆煲將會減低消費意慾嘅現實。雖然，公司盈利不但不會減少，甚至可能繼續有增長，不過因 為利豐市盈率咁高，市場一定要見到20%嘅盈利增長，增長只要一放慢，投資者可以接受嘅市盈率就可以暴跌。到時每股盈利上升10%，不過市盈率跌一半，公 司股價就可以跌45%。數就係咁計，所以除非利豐真係可以戰無不勝，豬年最應沽嘅藍籌股就係佢！