另一金銀大升浪嘅開端？

噚日，孫柏文去 飲茶，坐低打開我哋《蘋果日報》財經版睇。一睇就睇到財經版嘅頭條新聞係「金屬價全線漲升勢未止」。作為「白銀戰隊隊長」嘅我，睇到咁樣嘅新聞當然興奮。 因為自從06年5月，金屬價格都好似被人遺忘咗，黃金、白銀，已經好耐冇過頭條新聞。

其實，睇番上個禮拜黃金、白銀走勢，金銀價係喺禮拜四紐約時間突然飆 上。當晚，我喺屋企一路上網一路睇電視，睇花旗國財經新聞啦啦隊台CNBC。佢哋台上面啲分析員就話：「貴金屬價錢上揚原因，係因為當日公布嘅通脹數據， 比預期高咗少少。」雖然個分析非常行貨，甚至可以話係書本中個個學生都會抄嘅model answer，不過孫柏文都要篤爆呢個謬論嚟分析。

冇錯，買黃金、白銀嘅人，都係好似我咁，怕咗一眾中央銀行為首嘅紙幣狂魔，會濫發鈔票，令紙幣染上購買力下跌嘅病，繼而爆發通脹呢個症狀。不過，話金價、銀價喺一日之內突然飆上，係因為單月通脹數據有0.2%而非0.1%，就真係有少少牽強。

冇咗放債網絡

其實，孫柏文覺 得上個禮拜四金銀價飆上嘅真正原因，係又有另一間花旗國樓宇按揭中介人執笠。大家可能會問：「按揭中介人執笠，點解會令金銀價上升？」原因係，聯儲局其實 已經擔心花旗國樓市爆煲，雖然聯儲局歷年來有充足經驗去減低資產爆煲對經濟嘅傷害。方法就係「資產爆一鑊、紙幣發一鑊」，不過就算濫發鈔票，將錢推入銀行 體系，聯儲局都要有渠道去放債，先至可以彌補爆煲對經濟嘅傷害。

現在最大嘅問題，係呢啲擁有龐大放債網絡嘅按揭中介人相繼執笠。以前，聯儲局擺一蚊入銀行 體系，就可能會有一蚊嘅經濟活動，不過因為冇咗放債網絡，現在要擺三蚊先至有一蚊嘅經濟活動。咁大家可能會問：「嗰兩蚊點？」嗰兩蚊？攞嚟炒嘢囉！

如果大 家睇番黃金呢兩年嘅走勢（附圖），會發覺自從06年5月之後，金價一路不能升穿650美元一盎斯。最後要去到07年2月8日，先至升穿650美元。嗰日發 生咗咩事？2月8日就係滙豐銀行因為花旗國樓宇按揭出事，出首次盈利警告嘅大日子。孫柏文相信金銀價首先會挑戰舊年高位，如果到時眾中央銀行唔打壓金銀價，就會好似05年9月咁──係另一金銀大升浪嘅開端！