噚日，有一位「白銀戰隊成員」，FB先生嚟探班。孫柏文其實一早已經同FB先生有電子郵件來往，一路以來都有交換白銀投資心得。不過因為FB先生係一個長駐內地工作嘅香港人，所以要等到春節假期先至可以喺我哋特區見見面。
可能因運用電郵溝通，始終不能100%傳情達意，今次面對面暢談，令我感受到，原來做「白銀戰隊隊長」，唔係我想像中咁孤獨。因為喺06年3月6日，孫柏文日日叫大家買白銀之前，已經有人同我一樣，覺得白銀將會有段倍計升幅。雖然，FB先生都有買埋黃金，而唔係「一注獨贏買白銀」，不過FB先生對白銀嘅信心不比我弱。我諗FB先生只係比我相信分散投資呢個概念，所以先至會買埋黃金，而我一注獨贏就得。
今次同FB先生交換白銀投資心得，我都學到新嘢，所以想同大家分享。首先，FB先生同我一樣都非常相信「建制」操控「紙幣狂魔」去濫發鈔票，繼而引發通脹。亦同意喺紙幣購買力不斷削弱嘅情況之下，唯一可以保護自己購買力嘅方法，就係買貴金屬。
不 過，原來FB先生更推進一步諗過，如果「建制」見到平民百姓個個走去買貴金屬，放棄紙幣嘅時候，會有乜嘢反應？會有乜嘢政策令「紙幣狂魔」不死？FB先生 話，原來喺20世紀30年代初，花旗國第一次將美元對黃金貶值嘅時候，亦同時間通過法例令平民百姓不可以再擁有黃金。雖然，呢段歷史我都知道，不過根據 FB先生講，當時花旗國政府原來派人去全國各地嘅銀行，逐個逐個私人保險箱開嚟睇睇，如有發現黃金，即刻充公。
速速買實貨最穩陣
小 弟真係要承認，唔知原來當年花旗國政府，開人哋啲私人保險箱去充公黃金，因為我仲估呢種卑劣行為，只得發行「金銀券」嘅解放前國民黨政府先至會做。當然， 知道我哋特區有好似FB先生，呢啲有咁高危機感嘅「白銀戰隊成員」，我都好開心。而我亦當然加問：「FB先生，咁你手頭上嘅實貨白銀又係喺邊度買呢？」 FB先生答：「哈、哈！其實我啲白銀，仲係某香港中資銀行嘅紙上白銀。我都明白要買實貨白銀，不過仲未去買。我諗短期之內，政府仲未會出充公呢招！」雖 然，我都覺得「短期之內」政府都應該唔會充公大家啲白銀住，不過我仍希望FB先生同買咗紙上白銀嘅你，會盡快搞掂佢，將紙上白銀變成實貨白銀！
No comments:
Post a Comment