寫港女！

早幾日，孫柏文喺副刊版見到李怡先生開筆寫港女，非常精采，仲用埋經濟學之中最耳熟能詳既供應同需求嚟分析男女關係，分析以前點解台灣妹會咁騷，港女又點解會高竇。同埋有見到李怡先生分析形勢應該開始改變，因為我哋特區慢慢變咗女多男少。

不過睇睇吓，我睇到李怡先生話：「現在大概對一個女孩說『你好漂亮』，已不大會被認為是想『媾』她，或想佔她便宜……」

我睇完，諗咗一諗，發覺李怡先生可能因為已經係個深居簡出、唔需要再上場衝鋒陷陣嘅老將，所以唔會明白好似孫柏文， 呢啲日日仲喺前線上苦戰嘅士兵慘況。不過，我再睇埋之後嗰句，先至明白：「除非你態度輕佻或惡形惡相……」我睇完再諗一諗，就算我唔衰第一樣，都肯定衰第 二樣。平時，我讚女仔靚嘅時候，佢哋都會扮鹹蛋超人，將雙手搭成十字，出死光嚟保護自己。小弟一定要承認，果然薑越老越辣，佩服佩服！

不過講真，香港30至39歲嘅人口之中，每100個男就有139個女，的確出現咗一個供求失衡嘅現象，至於供應較大嗰一方有冇因此而「減價」，唔再「吊起嚟賣」，佢哋嘅態度有冇變？仲高唔高竇？講真，對於我呢個喺沙場上搞到血肉模糊嘅前線小卒，真係覺得好似冇乜點變過。

不過最後，孫柏文想同大家講，我真係唔鍾意寫港女，因為實在有太多陰影，怕一寫就會思潮氾濫，一發不可收拾。如果他朝有緣，再同大家分享！